کراچی(رم نیوز) پاکستان سپر لیگ (پی ایس ایل) کے گیارہویں سیزن کے لیے کراچی کنگز نے اپنی ٹیم کو مضبوط بنانے کے لیے بڑا قدم اٹھاتے ہوئے انگلینڈ کے مایہ ناز آل راؤنڈر معین علی کو بھاری معاوضے پر سائن کر لیا ہے۔کراچی کنگز کی انتظامیہ نے معین علی کو پی ایس ایل 11 کے لیے 'ڈائریکٹ سائننگ' کے تحت سکواڈ کا حصہ بنایا ہے۔ اس معاہدے کی اہم تفصیلات درج ذیل ہیں

معین علی کو 6 کروڑ 44 لاکھ روپے کے عوض سائن کیا گیا ہے۔

معین علی اس سے قبل 2020ء میں بھی پی ایس ایل کا حصہ رہ چکے ہیں، تاہم اب چھ سال بعد ان کی واپسی کراچی کنگز کے رنگوں میں ہوگی۔

فرنچائز نے معین علی کی شمولیت سے قبل ہی اپنے چار اہم کھلاڑیوں کو برقرار (Retain) رکھنے کا اعلان کر دیا تھا، جس سے ٹیم کا ڈھانچہ واضح ہو چکا ہے۔

حسن علی: پلاٹینم کیٹیگری میں برقرار،عباس آفریدی: ڈائمنڈ کیٹیگری کا حصہ،خوشدل شاہ: گولڈ کیٹیگری میں ٹیم کے ساتھ رہیں گے، سعد بیگ: ایمرجنگ پلیئر کے طور پر ٹیم میں موجودہیں۔

تجزیہ کاروں کا کہنا ہے کہ معین علی کی صورت میں کراچی کنگز کو ایک تجربہ کار سپنر اور جارح مزاج بلے باز مل گیا ہے، جو مڈل آرڈر میں ٹیم کے لیے ریڑھ کی ہڈی ثابت ہو سکتے ہیں۔ حسن علی اور عباس آفریدی جیسے فاسٹ بائولرز کے ساتھ معین علی کی شمولیت ٹیم کے بولنگ اٹیک کو مزید متنوع بنا دے گی۔